Friday, July 21, 2017
Reg:No 91291/Kermal/2004/18734

'പെപ്‌സി രാജധാനി', 'കോക് ശതാബ്‌ദി' എന്നീ പേരുകളിൽ ട്രെയിനുകൾ വരുന്നു

'പെപ്‌സി രാജധാനി', 'കോക് ശതാബ്‌ദി' എന്നീ പേരുകളിൽ ട്രെയിനുകൾ വരുന്നു

ന്യൂഡൽഹി: 'പെപ്‌സി രാജധാനി', 'കോക് ശതാബ്‌ദി' എന്നീ പേരുകളിൽ ട്രെയിനുകൾ വരുന്നു.  ട്രെയിനുകളും റെയിൽവേ സ്റ്റേഷനുകളും ബ്രാൻഡ് ചെയ്യാൻ ഇന്ത്യൻ  റെയിൽവേ ഒരുങ്ങുന്നു. എന്നാൽ ഈ തീരുമാനം മൂലം യാത്രാ നിരക്കുകൾ വർധിപ്പിച്ച് യാത്രക്കാർക്ക് ബുദ്ധിമുട്ടുണ്ടാകാതിരിക്കാനും റെയിൽവേ ശ്രദ്ധിക്കും. അടുത്താഴ്‌ച തന്നെ ഇത് സംബന്ധിച്ച തീരുമാനം റെയിൽവേ കൈക്കൊള്ളും. പുതിയ നിയമം അനുസരിച്ച് പെപ്‌സി, കൊക്കകോള പോലെയുള്ള വൻകിട കമ്പനികൾക്ക് ട്രെയിനുകൾ ബ്രാൻഡ് ചെയ്യുന്നതിനുള്ള പൂർണ അധികാരം റെയിവേ നൽകും. അങ്ങനെ ബ്രാൻഡ് ചെയ്യുന്ന ട്രെയിനുകളുടെ അകത്തും പുറത്തും കമ്പനിയുടെ പരസ്യങ്ങൾ പതിക്കാനുള്ള അവകാശവും റെയിൽവേ നൽകും.
 
ഇതേ രീതിയിൽ റെയിൽവേ സ്റ്റേഷനുകളും ബ്രാൻഡ് ചെയ്യാനുള്ള അവകാശം കമ്പനികൾക്ക് നൽകും. റെയിൽവേയിലെ മുതിർന്ന ഉദ്യോഗസ്ഥരുമായി പ്രധാനമന്ത്രി കഴിഞ്ഞ ദിവസം നടത്തിയ ചർച്ചയിൽ കൂടുതൽ വരുമാനം കണ്ടെത്താൻ നൂതനമായ വഴികൾ കണ്ടെത്തണമെന്ന് ആവശ്യപ്പെട്ടിരുന്നു. ഇതിന് വൻകിട കമ്പനികളുടെ പരസ്യങ്ങള്‍ നല്‍കുക എന്നതാണ് പ്രധാനമന്ത്രി മുന്നോട്ട് വെച്ച ഒരു പ്രധാന ആശയം. റെയിൽവേ സ്‌റ്റേഷനുകൾ ലോകോത്തര നിലവാരമുള്ളതാക്കണമെന്ന് പ്രാധാനമന്ത്രി ആവശ്യപ്പെട്ടിരുന്നു. പുതിയ പദ്ധതി പ്രകാരം യാത്രാനിരക്കുകൾ കൂടാതെ 2000 കോടിയോളം രൂപ റെയിൽവേക്ക് അധിക വരുമാനമുണ്ടാകുമെന്നാണ് കണക്കു കൂട്ടൽ.